دونن آخشام چاغی سن‌سیز منی آغلاتدی یاغیش
یادیما سالدی سنی مطلبینه چاتدی یاغیش
کوچه لر اولدو گؤزومده یئنه بیر آرپا چایی
منی سن‌سیز نئجه نیسگیل سئلینه آتدی یاغیش
اودو سؤندورمه گه سو قایداسی دیر آمما دونن
کؤزه ره ن کؤنلومو یاغدیقجا آلوولاتدی یاغیش
یادا سالدی اؤ یاغیشلیق گونو کی اوندا منی
کَپنَک تک باشینا شوقیله اویناتدی یاغیش
دامجی دامجی سنه لای لای دئدی قوینومدا منیم
نه دئیم بلکه سنی کورپه یه اوخشاتدی یاغیش
بوخاغیندان آخاراق بیلدی شیرینلیک شانیسان
گول اوزوندن سوزولوب بال فَره سین داتدی یاغیش
دوداقین قیرمیزی گوللر کیمی آچمیشدی سنین
سوزولن واخت او دوداقلاردا قانا باتدی یاغیش
او قدر مستیدیم هئچ بیلمدیم آخیر نه زامان
سینه م اوسته ساریلان تئل‌لری ایسلاتدی یاغیش
سورا بیلدیم آپاریب قورد کئچینین شنگولوسون
سنی مندن آلیب آنجاق منی آلداتدی یاغیش
دونن آخشام گئنه بیر سودا دا گوردوم کی منه
آجیلیقلا او شیرین خاطیره نی ساتدی یاغیش
اویانیردیم کی باشیم دَیدی ملامت داشینا
منی رؤیادان اویاتماقدان اؤزی یاتدی یاغیش
درباره این سایت